滾水蛋，蝴蝶酥
....滾水蛋，蝴蝶酥
異地吃蝴蝶酥，一口氣吃了三件，飲齋啡，嘗苦澀，想起徒置區16座明園的滾水蛋及蝴蝶酥，老媽曾帶我在這「下午茶」，由於衹有兩次，故此印象深刻。
徙置區16座明園冰室，65年七八月某天下午二時許，老媽下午菜檔開市前帶我到明園，14座擋著大部份西鈄太陽，冰室頭頂幾把三葉吊扇攪動空氣，涼浸浸，冰室衹有桌椅，無雜物，每吋平面，鋪滿磚仔，坐在其中，感覺清涼無比。
老媽代叫滾水蛋，伙記端一杯滾水，內裡蛋白飄逸如絲帶，蛋黃半凝固，戳破，黃色蛋漿混合蛋白在杯中旋轉飄動，未飲已開心。蛋腥味重，雖已加入白沙糖，入口始終有點腥。滾水蛋，好玩而不好飲。
餅櫃內有蛋撻，椰撻，捲蛋，蝴蝶酥。腦袋飛快計算，蛋撻是首選，冇幾隻入口，不過癮，如吃幾隻，很花錢，那就改爲吃蝴蝶酥吧，貪其大如手板，耐吃抵飽，然後就是條條片片剝下，仔細咀嚼，當時那陣牛油酥香味，深印腦海。
爲何不選檀香咖啡，西冷紅茶，好立克，可可？老媽說"熱氣"，小孩不宜，飲後易疴。問：「可口可樂，哥喇(即cola)可以嗎?」答：「唔好飲啦，生冷嘢壞腸胃，都喺容易疴」。不喝就不喝，冇所謂，知道是爲慳幾毫子。我明白。
老媽目不識丁，爲求生活，膽粗粗擺賣於街市一角，衹求賺取生活支出。無牌擺賣要承受風險，時有貪警收規，唔識趣俾少咗錢就被借意拉回警署留難一番。
泳池未起之前，山邊寮屋及附近街坊多幫襯街市仔，買餸時段人流如鰂，摩肩接踵，脚尖踩脚㬹。70年代初泳池建成，木屋居民上樓，街市仔重新規劃，檔口排列整齊，但不經意地，它已過了最熱鬧，最有活力的時期。
滾水蛋及蝴蝶酥牽引起記憶片片，印象仍甚清晰，説舊事，憶前人，既懷念母親，也懷念母親那一代人。街市仔小販與顧客叫賣叫買，討價還價，薑葱豆豉鹽油菜魚肉，生意，形形式式，財貨互利互濟，人，形形役役，苦於貧困憂患，下午黃昏趕買餸，晚煑飯煲湯，各人都擔當養家角色，冇時得閒。忙，忙生活，忙生存，忙得冇笑容。
明園冰室滾水蛋蝴蝶酥，於我而言，印象一世，母親帶我去飲「下午茶」，生活壓力下抖啖氣，做小販，點都會揾到抖氣位，當母親，就一世都唔得閒，憂柴憂米憂子女，憂愁多，快樂少，少笑容。我明白。-2023年清明
Subscribe to:
Posts (Atom)